ഒരു ധനുരാവ്

ഒരു ധനുരാവ്
........................
സമ്മതമില്ലാതെ
നിലാവിന്റെ ചുണ്ടുകൾ
കടിച്ചു മുറിക്കുന്നു,
ഫ്ലാറ്റിലെ തെമ്മാടി വെളിച്ചം.

നീയതോഫാക്കൂ
ഓഫാക്കൂ!
എനിക്കിതു കാണുവാൻ വയ്യ
ടിവിയിലേതോ ഭീകരസിനിമതൻ രംഗം
സമയത്തിന്റെ രക്തം പോലെ
ചുവന്ന വെളിച്ചം
വാർന്നൊഴുകുന്നു
അതും വേണ്ട,
വേണ്ട
എനിക്കതു സഹിക്കുവാൻ വയ്യ
വരൂ ,
ഒന്നിച്ചല്പനേരമിരിക്കാം
ടെറസ്സിലേകാന്തതയിലേക്ക് നടക്കാം
പൗർണ്ണമിത്തെളിയിലൊന്നു
മുഖം കഴുകാം.
അല്പനേരം ധനുമാസത്തിനൊപ്പം
മാമ്പൂക്കളെ പോൽ
മധുരവുമായ്
തൊട്ടുതൊട്ടിരിക്കാം
മൊബൈലില്ലാതെ
മോഹങ്ങളില്ലാതെ
ഭാരങ്ങളൊന്നുമില്ലാതെ
അല്പനേരം മഞ്ഞുപോലെ
എന്നിലയിൽ കിടക്കാം.
അപ്പോൾ നമ്മെയീ തണുത്ത മാരുതൻ
നിശാഗാനമായ് മീട്ടും
പാതിരാപ്പൂക്കളേതോ
വിദൂര വിസ്മൃതിയിൽ
നിന്നുമതു കേൾക്കും
അന്നേരം
തീക്കട്ട പോലൊരു കണ്ണ് *
വാനിനേകാന്തതയിലിരുന്ന്
നമ്മെ നോക്കി വിതുമ്പും.
- മുനീർ അഗ്രഗാമി
* തിരുവാതിര തീക്കട്ട പോലെ എന്നു പഴഞ്ചൊല്ല്