ഉറക്കം വരാതെ

പകൽ  

പരാതി പറയാതെ പോയ വഴിയിൽ
നാം കുറേനേരം നിന്നു

കടൽക്കാറ്റ് 

 നമുക്കിടയിൽ വന്നിരുന്നു
നിന്റെ  പരാതി കേൾക്കുന്നതിനിടയ്ക്ക്
അതറിഞ്ഞില്ല ,
കാറ്റ് തിരിച്ചുപോയി .

വേദനകളിൽ നോക്കി നില്ക്കെ 

 നമുക്കുമുകളിൽ
ആകാശം വരച്ച ചിത്രം നാം കണ്ടില്ല

മുറിവുകൾ തൊട്ടു നോക്കെ
തിരകളിൽ നമ്മെ തിരഞ്ഞു 

 സഞ്ചരിക്കുന്ന സന്തോഷവും
നാം അറിഞ്ഞില്ല

രാത്രിയും പകലും കടന്നുപോകുന്നു
നാം ഒരു കപ്പൽ സ്വപ്നം കാണുമെന്നു കരുതി
ഉറക്കം വരാതെ കിടന്നുരുളുന്നു.