ജലയുദ്ധം

തീവണ്ടിയിൽ കുടിവെള്ളത്തിനായ്‌
കുപ്പിവെള്ളം വിറ്റു നടന്നവൻ
ജലയുദ്ധം വരുമെന്ന് നാം തർക്കിച്ചത്
കേൾക്കാതെ നടന്നുപോയി

തർക്കം മൂത്ത് അടിയായി
കുപ്പിവെള്ളം മറിഞ്ഞു
ജലവിൽപ്പനക്കാരൻ വീണ്ടും  വന്നു

ഒരു ബോട്ടിൽ വാങ്ങി
ചർച്ച അവനെ ക്കുറിച്ചായി
അവൻറെ ദേഹത്ത് ജലം കുറവുണ്ടോ  ?
അവൻ കുളിച്ചി ട്ടുണ്ടോ ?
അങ്ങനെ ചർച്ച നീണ്ടു  ...

നമ്മുടെ ശരീരത്തിൽ ജലം കൂടുതലായിരുന്നു
മനസ്സിൽ നനവു കുറവായിരുന്നു
നാം മഴ കൊണ്ടിരുന്നില്ല
നാം പുഴയുടെ കുളിരറിഞ്ഞിരുന്നില്ല

നമുക്ക് കിണറ്റിലെ രുചി മനസ്സില്ലയിരുന്നില്ല
യാത്ര നമുക്ക് ഹരമായിരുന്നു , 

പക്ഷേ
നാം നമ്മുടെ പറമ്പിന്റെ  അതിര് കണ്ടിരുന്നില്ല
അതിരിൽ നമ്മെക്കാത്തിരുന്ന കാട്ടുചെടികളെ
നാം തിരിച്ചറിഞ്ഞില്ല ....

യാത്ര കഴിഞ്ഞു ,

 നാം കുപ്പികൾ വലിച്ചെറിഞ്ഞു
പുതിയ വിഷയവും ചർച്ചയും വന്നു

അവനെ നാം മറന്നു
നാം നമ്മുടെ തീ പുകയാത്ത അടുപ്പിൽ
തീപ്പൊരിയാവാതെ കരിഞ്ഞുപോയ്.