............കവിതാലഹരി............ മുനീർഅഗ്രഗാമിയുടെ മലയാള കവിതകൾ

പരീക്ഷ

ഇറങ്ങിവന്നില്ലെത്ര വിളിച്ചിട്ടും;

നീ തന്ന സമയം മതിയാവില്ല

എനിക്കുത്തരമാകുവാൻ

കിണർ

ആകാശം നോക്കിക്കിടന്ന്
തന്നെക്കാണുന്നവരുടെ

കണ്ണിൽ തെളിഞ്ഞ്
മനസ്സുതുറന്ന്
തുളുമ്പാതിരുന്ന
ഒരു വലിയ മനുഷ്യനാണ് കിണർ.

ഉയരത്തിലല്ല ,
ആഴത്തിലാണ് അയാളുടെ നിൽപ്പ്
ആഴ ത്തിലുള്ളത് അളക്കാതെ തന്നു
കൊടുക്കലിന്റെയും
എടുക്കലിന്റെയും
ആനന്ദം ഓരോ പാളയിലും നിറച്ചു.

പുലരിയിലേകാന്തമായ്
അടുക്കളപ്പെണ്ണിനെ കാത്തിരുന്ന്
അവളുടെ സങ്കടങ്ങൾ കേട്ടു;
അവളെ നോക്കിച്ചിരിച്ചതിൽ
കൂടുതൽ കരഞ്ഞു

കണ്ണീരവൾക്കു കൊടുത്തു
കുടവുമായവൾ മടങ്ങവെ
നിർവൃതിയടഞ്ഞു

അടുക്കളപ്പെണ്ണുങ്ങൾക്ക്
വംശനാശം വന്നതിൽ പിന്നെയാണയാൾ
വറ്റിപ്പോയത് .

അയാളുടെ ഫോസിലുകൾ
വിദൂര ഗ്രാമത്തിൻ നെഞ്ചിലെ
പാറയിടുക്കുകളിൽ
പറ്റിപ്പിടിച്ചിട്ടുണ്ടെ
പൈപ്പ് ഞെക്കിയും

തിരിച്ചും
ജലമളക്കുന്നവരതു കണ്ടെത്തുമോ?

അച്ഛനും മകളും

ആട്ടും തുപ്പും കഴുകിക്കളഞ്ഞ്
ആട്ടങ്ങളെല്ലാം നിർത്തി വെച്ച്
നാട്ടിലേക്കുള്ള തീവണ്ടിയിൽ നിന്ന്
നാടുതെണ്ടിയുടെ വേഷമഴിച്ച്

മുറിവുകൾ മറച്ചുവെച്ച്
മുഖം മിനുക്കി .

വീട്ടിലേക്കുള്ള വഴിയിൽ നിന്ന്
വീട്ടുകാരന്റെ വേഷമണിഞ്ഞു

മനുഷ്യനിങ്ങനെ പുലരുമെന്ന്
മകൾക്ക്
മനസ്സിലാകുമോ എന്നറിയാതെ
നടന്നു ,
പാവം ഗൃഹനാഥൻ