നഷ്ടപ്പെട്ടവരുടെ ഇഷ്ടങ്ങൾ ..................................................

നഷ്ടപ്പെട്ടവരുടെ ഇഷ്ടങ്ങൾ
..................................................

സ്പർശിച്ച ചിലർ
വസന്തം പോലെ
മറയുമ്പോൾ

നഷ്ടപ്പെട്ടവരുടെ
ഇഷ്ടങ്ങളിൽ നിന്ന്
സങ്കടം പറന്നു വരും

ചിടകടിച്ച് തളർന്ന്
കടൽത്തിരകളെ പോൽ
നമ്മെ നനയ്ക്കും

അനാഥമായ കിളി
മരം വീണതറിയാതെ
മരം തേടുമ്പോൽ
നഷ്ടപെട്ടവരുടെ
ഇഷ്ടങ്ങളിലേക്ക്
മനസ്സ്പറക്കും

അവർക്കിഷ്ടമാം പാട്ടുകൾ
കേൾക്കവെ അത്
നമുക്കവർ തൻ രോദനം

അവരുടെ ഇഷ്ട ഭക്ഷണം
കഴിക്കവേ
നമുക്കവർ തൻ രുചി

അവർക്കിഷ്ടമാം
വസ്ത്രം ധരിക്കവേ
നമ്മിലവർ തൻ കണ്ണുകൾ

അവർ ചലിച്ച ഇടങ്ങളിൽ
കാറ്റു വന്നു നോക്കവേ
നമുക്കതവർ തൻ നിശ്വാസം

ഇഷ്ടപ്പെട്ടവരുടെ നഷ്ടത്തിൽ ,
നഷ്ടപ്പെട്ടവരുടെ ഇഷ്ടങ്ങൾ
നഷ്ടപ്പെടുന്നേയില്ല