പുറത്തായവളോട്

പുറത്തായവളോട്
...............
അടുക്കളയിൽ നിന്നും
പുറത്തായവളേ
നീ
വേദിയിലുണ്ടായിരുന്നില്ല
വേലിക്കൽ പോലും
ഉണ്ടായിരുന്നില്ല
എന്നിട്ടും നിന്നെ തേടി
ആരും വന്നില്ല

പണ്ടും അങ്ങനെയായിരുന്നു
നിന്നെ തേടിയാരും വന്നിരുന്നില്ല
നീയായിരുന്നു തേടിപ്പോയത്
രാധയായ്
ഗോപികയായ്
ഉത്തരയായ്
ശൂർപ്പണഖയായ്...

മീരയായ്
തേടിക്കൊണ്ടിരിക്കെ
നീ സമരം ചെയ്തു നേടിയ
ഇടത്തിൽ നിന്നും
പുറത്തായി

അകത്തായവരുടെ
അകത്ത് നീയില്ല,
പുറത്തായ നിൻ്റെ അകത്ത്
അവരുണ്ട്
അതുകൊണ്ട്
എളുപ്പം നിന്നെ
അവർ പറ്റിക്കുന്നു

നിന്നെ ഓർമ്മയിൽ കെട്ടിയിട്ട്
അവർ നിൻ്റെ സ്വത്വം
വിവർത്തനം ചെയ്ത് വിൽക്കുന്നു