കുതിര
.............
ഏഴിലകളുള്ള കുതിരയെ
സ്വപ്നം കണ്ടു.
എല്ലാ മരങ്ങൾക്കും വേണ്ടി
അത് കുതിച്ചു പാഞ്ഞു.
മൗനത്തിന്റെ താഴ് വരയിലൂടെ
കാറ്റു പോലെ കുതിച്ചു
കുന്നിറങ്ങുന്ന അരുവിയുടെ
തൊട്ടടുത്ത് അതു നിന്നു
കുതിരയുടെ
ഏതോ ഒരിലയിലേക്ക്
ഒരു കിളി
പെട്ടെന്ന് പറന്നു വന്നു
ചുവന്ന ചിറകുകൾ ഒതുക്കിയിരിക്കുന്ന
അതിന്റെ പേരെനിക്കറിയില്ല
ഞാനതിനെ പൂവെന്നു വിളിച്ചു
നിങ്ങൾക്കതിനെ
സിന്ദൂരപ്പൊട്ടെന്നോ
മഞ്ചാടിയെന്നോ
രക്തബിന്ദുവെന്നോ വിളിക്കാം
അതിനു പരാതിയുണ്ടാവില്ല
കുതിര ഇപ്പോൾ കുതിക്കും
അതിനു മുമ്പ് വിളിക്കൂ
- മുനീർ അഗ്രഗാമി
No comments:
Post a Comment