നാലു കാര്യങ്ങൾ

നാലു കാര്യങ്ങൾ

*****************

തടവ്

........

വിരഹത്തിൻ്റെ യും സഹനത്തിൻ്റേയും

അഴികളെണ്ണി

രണ്ടു ജയിലുകളിൽ

മൗനം ഭക്ഷിച്ച്

നമ്മുടെ ആഗ്ര ഹങ്ങൾക്ക്

ജീവപര്യന്തം

***

തടവിലെ ആഗ്രഹം

.................

നാമകപ്പെട്ട ജയിലുകൾക്കിടയിൽ

ജീവിക്കുന്ന സ്ഥലം

ചുരുങ്ങിയൊരു മതിലായാൽ

ഞാൻ ബഷീർ

നീ നാരായണി

വാക്കുകൾ നമ്മുടെ ഹംസങ്ങൾ

***

പക്ഷേ,സംഭവിച്ചത്

....................

സമയത്തിൻ്റെ ഇടയൻ

നിൻ്റെ മുടിയിലെ കറുപ്പും

എൻ്റെ തൊലിയിലെ

മിനുസവും കൊണ്ടുപോയി

അന്നേരം നിൻ്റെ സങ്കടം

എൻ്റെ സങ്കടം കാണാൻ കാത്തിരുന്ന്

ഉറങ്ങിപ്പോയി

***

അനന്തരം

................

ദൂരത്തിൻ്റെ രണ്ടു കൊമ്പുകളിൽ

വാടിപ്പോയ നമ്മുടെ പൂവുകൾ

കൊഴിയാൻ മടിച്ച്

ഉണങ്ങി നിൽക്കുന്നു

വിടർന്നതിൻ്റെ അടയാളമായി

വെറുതെ

..............................

മുനീർ അഗ്രഗാമി