ദൃശ്യ മഴു

ദൃശ്യ മഴു

മരത്തിൽ നിന്ന് ഞാനൊന്നും കേട്ടില്ല .

മരം എന്നോട് മിണ്ടാതായതാണ്

സിദ്ധാർത്ഥനായിരുന്നപ്പോൾ

നിശ്ശബ്ദമായ് മരം പാടിയ

പാട്ടുകേട്ടാണ് ബുദ്ധനായത്

കാക്കയായിരുന്നപ്പോൾ

കൂടുണ്ടാക്കാൻ പറഞ്ഞു

കൂടെ നിന്നതാണ്

തേനീച്ചയായിരുന്നപ്പോൾ

പൂവിൽ നിന്ന് പൂവിലേക്ക്

പ്രണയം കൊണ്ടു പോകാൻ

ഹംസമാകാൻ പറഞ്ഞതാണ്

വരരുചിയായിരുന്നപ്പോൾ

മരത്തിൽ നിന്നാണ് വിധി പറഞ്ഞത്

മരമായിരുന്നില്ല പറഞ്ഞത്

ഇപ്പോൾ മരം മിണ്ടുമെന്നു കരുതി

അടുത്തു ചെന്നതാണ്

ഒന്നും മിണ്ടിയില്ല

സങ്കടപ്പെട്ട് തിരിച്ചുപോരുമ്പോൾ

എന്റെ കയ്യിലിരുന്ന്

ഒരദൃശ്യമഴു ചിരിക്കുന്നു

വികസനത്തിൻ്റെ മൂർച്ചയുണ്ടതിന്.

....മുനീർ അഗ്രഗാമി