എന്റെ ഭാഷകൾ

എന്റെ ഭാഷകൾ
...........................

എല്ലാ ഭാഷകളും എന്റെ ഭാഷയാണ്
അർത്ഥങ്ങൾ എന്റെ ഉള്ളിൽ നിന്നിറങ്ങി
വാക്കുകളിൽ ചെന്നിരിക്കുമ്പോൾ
ഞങ്ങൾ തിരിച്ചറിയുന്നു

മകൻ ,അച്ഛൻ ,വല്യച്ഛൻ
എന്നിവർ വിളി കേൾക്കുന്ന ശബ്ദങ്ങൾ
എന്റെ ചരിത്രമാണ്
പുഴ ,പൂവ് ,പുഴു
എന്നിവ
എന്റെ കണ്ണണുകളിൽ ജീവിക്കുന്നതു തന്നെ

ചില ലിപികൾ
അണ്ണാന്റെ മുതുകിലെ
വരപോലെ,
മീനിന്റെ വാലിലെ എഴുത്ത് പോലെ,
മരത്തിൽ ഋതുക്കൾ വരയ്ക്കുന്ന കവിത പോലെ
എനിക്ക് വായിക്കാനാവുന്നില്ല
എന്നേയുള്ളൂ

ചില ഭാഷയിലെ ശബ്ദങ്ങൾ
കളിയൊച്ച പോലെ
പൂച്ചകളുടെ വഴക്കു പോലെ
നെഞ്ചിൽ ചവിട്ടല്ലേ എന്ന്
കരിയില പറയുമ്പോലെ
എനിക്ക് മനസ്സിലാവുന്നില്ല
എന്നേയുള്ളൂ

എല്ലാ ഭാഷകളിലും ഞാനുണ്ട്
തടാകത്തെ കുറിച്ചും
കലാപത്തെ കുറിച്ചും
കണ്ണിമകളെ കുറിച്ചും
വിപ്ലവത്തെ കുറിച്ചും
എഴുതുന്നു

സത്യത്തിൽ ഭാഷ ദൈവമാണ്
അർത്ഥം അവന്റെ ഉണ്മയാണ്
അക്ഷരങ്ങൾ മൂർത്തികളാണ്
ഉച്ചാരണം പ്രാർത്ഥനകളാണ്
പ്രജകൾ വാക്കുകളുണ്ടാക്കി
അവനെ ആരാധിക്കുകയാണ്

എല്ലാ ഭാഷകളും
സത്യത്തിൽ ഒരു ഭാഷയാണ്
ഏക ദൈവത്തെ പോലെ

ഏതു ഭാഷയിലേയും കവിത
സച്ചിദാനന്ദവും.

-മുനീർ അഗ്രഗാമി

പുതു കവിത-32 പ്രാവുകൾ

പുതു കവിത-32

 പ്രാവുകൾ

.........................

തോക്കുകൾ സംസാരിക്കുന്നത്
പ്രാവുകൾ കേട്ടു നിൽക്കില്ല
ജീവനുണ്ടെങ്കിൽ
വെടിയൊച്ചകൾക്കും മുകളിൽ
അവ സമാധാനം തിരഞ്ഞ് പറക്കും .

-മുനീർ അഗ്രഗാമി

സ്വാതന്ത്ര്യത്തിന്റെ മുറിവുകളിൽ

സ്വാതന്ത്ര്യത്തിന്റെ മുറിവുകളിൽ

..............................................................

സ്വാതന്ത്ര്യത്തിന്റെ മുറിവുകളിൽ
രക്തം കട്ടപിടിക്കുന്നില്ല.
ഇറ്റി വീണിട്ടും രക്തത്തുള്ളികൾ
ഉണങ്ങുന്നില്ല
അവ കണ്ണീർത്തുള്ളികളോട്
ചേർന്നു നനയുകയാണ്
കരയരുതെന്ന്
കരഞ്ഞു തളർന്ന രണ്ടു പേർ
തമ്മിൽ പറയുമ്പോലെ,
അവ ചേർന്നു നിൽക്കുമ്പോലെ

രാജ്യത്തിന്റെ മുറിവുകളുണക്കാൻ
അറുപത് കൊല്ലം മുമ്പ്
നടന്നു തുടങ്ങിയവർ മരിച്ചിട്ടും
അവരുടെ നടത്തമവസാനിക്കുന്നില്ല
ഒരു മുറിവിൽ കാലിടറിയ എന്നെ
അതിലൊരാളാണ്
ഇന്നലെ പിടിച്ച് നേരെ നിർത്തിയത്
അയാളുടെ കൊടിയുടെ നിറം ഞാൻ കണ്ടിരുന്നില്ല
കൈവിരലിൽ നിന്ന് എന്റെ ഹൃദയത്തിലേക്ക്
പടർന്ന സ്നേഹമേ
കണ്ടിരുന്നുള്ളൂ

ദേശത്തിന്റെ അതിർത്തികളിൽ
പഴയ ഒരു മുറിവ് ഉണങ്ങിയ പോലെ കിടന്ന്
വേദനിക്കുന്നുണ്ട്
അതിന്റെ തുന്നലിൽ കിടന്ന്
ഉറക്കമില്ലാതെ പിടയുന്ന കുറച്ചു പേരെ
കണ്ടുമുട്ടി
അവർ ഉറങ്ങാൻ വേണ്ടി
എന്റെ നാട്ടിലേക്ക് വന്നു
കിടക്കാൻ ഒരിടം തരൂ എന്ന് പറഞ്ഞു
ഇവിടെ മുഴുവൻ രക്തമാണ്
നനയാതെ ഉറങ്ങാൻ പറ്റില്ല
ഞാൻ പറഞ്ഞു
കടലിലും മഴയിലുമുറങ്ങിശീലച്ചവർക്ക്
നനവ് സ്വർഗ്ഗമാണ്
അവർ പറഞ്ഞു

അവരുടെ വാക്കുകളിൽ
അല്പനേരം ഞാൻ
തളർന്നിരുന്നു പോയി

നാനാ ദിക്കിക്കിൽ നിന്നും
കുറെ കുട്ടികൾ ഓടി വന്നു
എഴുന്നേൽക്കൂ
അവർ പറഞ്ഞു
ഞങ്ങൾ ഒന്നിച്ചു കളിക്കും
ഒന്നിച്ചു നടക്കും
ഒന്നിച്ചു മുറിവുണക്കും

-മുനീർ അഗ്രഗാമി